孟加拉國之旅 7‧揾笨再續篇

上一篇貼出後，承墨爾本看官Wai先生留言。K先生讀到後要我代他向Wai先生致謝，並還要行路人代其在此作出回應。

 K先生說：這位Wai先生留言中講『若果佢係專業，敬業樂業，就應該自己和另外一位的座位給你們夫妻，自己坐你先生的位』，此說並未說到點子上，用毛潤之先生喜歡說的話來講就是『沒有擊中要害』。

當年四人幫之一的姚文元先生奉毛的旨意在上海寫了篇《評新編歷史劇海瑞罷官》，發表在上海文滙報上，吹響了文化大革命的號角，姚也因此進京成了取代書記處的中央文革小組成員，九大更進了政治局，深得毛/江夫妻店之信用。但毛先生對姚的這篇立了大功的《評新編》文章却很不滿意，說文章沒有擊中要害。毛說：『……要害是嘉靖皇帝罷了海端的官，我們罷了彭德懷的官』。而姚文元只是在文章中列舉海瑞的種種罪狀(如均徭、退田、平冤獄之類) 以及批判明史專家兼劇作者吴晗先生的一些學術觀點，根本就不是毛的初衷和著眼點，毛先生之志遠不在此，毛先生的目的是先要搞掉以彭真為首的北京市委，繼而搞掉他們的總司令劉少奇，而姚文元只是抓住吴晗這麼個北京的黨外副市長批來批去，毛先生當然覺得不過癮，所以要批評姚文元文章沒有擊中要害。由此可見這「要害」兩個字是何等重要，你如果抓住了這兩個字，就能把共和國主席都幹掉，如抓不住，只能弄個把民主人士副市長批吓，掀不起甚麼大浪……。而本人在莫斯科機場被人揾笨，事件的性質全不在一個座位問題，論其「要害」就是二個字：欺詐(欺侮加詐騙)。而所謂座位不過是欺詐行為的介質而已。正如在你上一篇的『K十條』中我已經指出，P領導親自赤膊上陣到機場Lounge來求我「就當幫吓」佢的那一刻，已經決定了事件的性質是有目的、有預謀的欺詐行為，決非是坐甚麽座位、以及座位好不好之類的婆乸數。何況一個人做事情是否「專業」，是否「敬業樂業」與他為人做事時會不會有欺詐行為無關。梁振英其人夠專業、夠敬業樂業咯，但一路以來都是謊言連篇，講大話呃人當食生菜那麼順溜清脆。所以就算P領導讓出個相連位給我倆公婆坐，他自己去同那個東北女人坐，也改變不了事件的性質，因為在此之前騙案已經發生了，他已經割了我的屁股肉煲成湯去獻給要飲人肉湯的訂戶了。不過他如果這麼做以作啲補飾的話，或許大面子上還沒那麼難看，或許狂飆未必為我從天落。本來P先生作為一個領導，如果夠專業的話，理當「吃苦在前、享樂在後」，何況你的機票都還是我等眾人夾錢給你買的，怎可「一事當前先替自己打算」，豈不喧賓奪主、本末倒置？顯而易見，講專業二個字對P先生而言也許太抽象或高深，那就說說人之常情吧，P先生比我後生近十年，純粹從敬老這一個角度而言，決無理由如此低莊地欺侮一個老人家的，但他居然可以置如此淺顯的做人道理於不顧，還侈談甚麽專業不專業，豈不是緣木求魚，與夏蟲語冰！那麼P先生為何要連這點大面子都不顧、連這麼一塊小小的遮羞布都扯掉呢？很簡單，就如同國泰機上安裝的座椅一樣，能裝70排他們決不只裝69排，能多賺你一毫子決不只賺九個仙，我們香港人就是這樣被「自己的」航空公司賺到盡、搾剩渣的。P先生也是如此，揾你笨他也都要揾到你盡！誰叫你自己充好漢說願意去坐沒人肯坐的最衰的位啊，那就『揾』這麼一個位給你坐了，還附送個靚女陪你過夜，你仲有乜可以阿吱阿咗嘅呢？誰叫你自己說不參加統一編位，說你們兩公婆不一定要坐在一起的？所以就算有相連位有多，也不安排你們兩公婆坐一起，你吹咩！因為到此一刻大事已辦妥，預訂人肉延壽湯的貴客正在津津有味地享用，眼下剩下要做的就是把你K某打發掉，費事你站在走廊上篤眼篤鼻，於是嗱嗱聲把你掟到爪洼國，要你捂往血淋淋的屁股到那個「水阻藍橋路不通」的衰位上去坐低，咁就萬事大吉、一了百了也。至於你K太上機後不知道去哪裡坐，見到有位就坐啦，未搭過飛機咩！P先生揾你笨就是如此揾到你盡，湯渣都不給你留一口！就好比你行山行到僻靜處，撞到山賊被打劫，為求不被賊人傷害，你唯有把隨身全部財物，如銀包、手機甚至手上戴的一塊膠手錶統統都交了出去。如好彩的話撞到有的賊人天良未滅，或是盜亦有道，見地處荒山野嶺，天色又黑將下來，他也可能會用你的手機幫你Call架的士在山下路口等，再從你的銀包中抽出身份證外加一二百圓給你搭的士回家。這可算是不幸中之小幸了。如果時運太差，遇到的山賊打劫都要劫到你盡，見你獻上的膠錶不值錢，隨手一扔，掉入山，此時個賊已經沒有好氣了，就如你(***指行路人) 獻出的機上坐位，對於P先生的預謀而言一點用處也沒有，既不能煲湯又不能漬泡菜，所以P生一早將之撇埋一邊不再理你，你上機後去哪裡坐？自己執生啦！那沒人性的山賊也一樣，收到你不值錢的膠手錶他已經覺得唔喇利，見你腰間條皮帶都算是名牌，唔駛客氣大力抽走，理得你條褲滑落地下。如果你還不知趣想要他給你留低一二百文搭的士，就自討苦喫了，個賊若是沒有像薄起來對王立軍那樣，抽你一個大嘴巴、給你個兜巴星，都算你是福星高照了。誰叫你自己話「日日行山都戴依隻膠錶嘅啦」。日日行山咁好腳力？咁你就行路返屋企啦，仲搭乜鬼的士啊，有得山路俾你行就行啦！飛機上有得個位俾你坐就坐啦！乜鬼「水阻藍橋」咁多嘢講，唱大戲咩，慳番啲啦笨！

 以上約二仟字乃老公對墨爾本Wai先生留言的回應，還望Wai生或其它看官幸勿再就此話題留言，因老公在莫斯科機場被人揾笨，為之耿耿於懷，正苦於無處撒氣發洩，你給他留言十幾廿個字，正好挑起佢條筋，閒閒地就再給你回上幾仟字，哋可以從四五十年前文革年代的君臣毛澤東和彭德懷，扯到四百五十年前嘉靖年間的君臣明世宗朱厚熜和海瑞，從搭飛機被人揾笨可以扯到行山被賊打劫，咁樣搞法行路人豈非好唔得閒？我叫佢自己開個博佢又唔開，冤氣之極(依家唔駛開了，雅虎網誌都就來收檔，壽終正寢，準備家屬謝禮罷啦)。用薄熙來在濟南公堂上自爆戴綠帽時的話來說：『真煩透了！』

 本來也想議論吓此單在山東濟南府公堂上的審薄大龍鳳 (甚至有損友居然來電還要本人就「和平佔中」VS「幫港出聲」單嘢講吓點睇，當正行路人乃時事評論員咁滯，並且在電話中嘲諷行路人『你唔係自稱與林行止〝英雄所見略同〞嘅咩？』咁話) ，不過如今叫老公被人揾笨單嘢搞到冇乜心計再關心和議論港事國事天下事，就繼續貼孟加拉嘅相吧———

 老公因無處伸冤，就走來本博非法佔中，搞公民抗命。科大經濟系主任雷阿鼎教授話，每佔中一天香港的經濟損失就達16億。行路人十分好奇雷教授是用甚麼Formula計算出16億這個數字，為甚麼不是15億也不是17億而正好是16億？如果俾行路人算出這條數，就唔係咁嘅講法了。 根據政府運輸署為港鐵設立的『可加可減』機制，再加上小學算術的『四捨五入』法則，一於『逢五進一』，齊頭取個整數講大啲：每佔中一天香港就要損失20億，如佔中一星期就損失140億，香港700萬人口每人可分得2000圓，如果此計算誤差值在允許範圍內、鬍鬚曾又應承如果不佔中就照此條數派錢的話，行路人義無反顧「幫港出聲」仲唔單止，仲會即刻帶住個智障仔，每人袋把菜刀去中環揾嗰個壽頭律師戴阿廷講數：你戴律師想保住條命都得：速速鎊水，一口價，我倆母子Total 4000文作為經濟損失之賠償，冇得講價。你戴阿庭非法和平佔中，我行路人非法持械索賠，大家都是非法，大家都是公民，大家都來抗命，上海話『大家腳踫腳』，禿鷹一哥要拉就齊齊拉。政壇元老李阿飛話齋：活到七十歲都沒食過皇家飯。托你戴律師嘅福，大家去試食吓皇家飯啦！入到監倉之後，趁你戴律師仲未被律師公會除牌，我即時聘你做我倆母子嘅辯護律師，不過律師費尾單找數時嘅銀碼肯定要扣除4000文賠款，依啲好溼碎啫……。 所以在錫爾赫特的都會國際酒店住了二晚，前兩篇中因為篇幅全讓老公被人揾笨單嘢佔去，搞到未能介紹吓錫爾赫特這個孟加拉的重要城市，在此作一補充如下。

 錫爾赫特(Sylhet) 是孟加拉國東北部的主要城市，人口約50萬，它是孟加拉國最大的城市之一。 周圍是Jaintia，卡西和特里普拉邦丘陵。 錫爾赫特地區是眾所周知的茶花園和熱帶雨林 。 在《孟之旅 5》中講到第七天上午一早出發去到最北部的印孟邊界，地名好易記，叫他媽比爾，位於揸弗龍(Jaflong) 地區，坐落在錫爾赫特地區 Gowainghat Upazila ，位於孟加拉國和印度梅加拉亞邦之間的邊界，離錫爾赫特市區約60公里。 這個地區居住著幾個土著部落，包括凱西族（Khasi）， 龐高族（Pangou）和曼尼坡族（Manipur），可以參觀他們的村莊。我們的行程書上特別註明入村後有機會見到凱西族人。行路人委實不知道這一個凱西族與其它族人比較有何特別之處。入過幾條村，所見到的村民個個樣都差唔多，也不知其中有冇凱西族人，也許個Guide介紹過而行路人顧住周圍影相未聽見。行路人寫博到此，特等再上網查吓有關資料，獲知這個凱西部落(Khasi Tribe)大多數生活在印度東北部的梅加拉亞邦地區和孟加拉國的部分地區。他們稱自己為HynñiewTREP，他們的語言凱西語屬最北端的南亞語系。凱西人按照他們部落的宗教信仰的公雞如果被犧牲了，人類將獲得救贖。唔怪得之我等入村後幾乎未見過公雞。該地區生產的主要農作物是檳榔葉 ， 檳榔， 橘子。還盛產編織品，包括傢俱，小型家庭用品以及包包籃籃等。

最最重要的一點是，凱西族部落至今仍還是一個母系社會，可惜因為我們此Trip組團太匆忙，行前未有做足功課，否則行路人一定會在行程中特別關注吓這個凱西族當今母系社會的情況，遺憾的是今後也不太可能再去一次孟國了，唯有徒呼「走寶」！

 Day 8. 是日驅車往南部的旅遊景區斯里芒果(Srimongal) ，該地區乃是一片丘陵，遍佈茶園、檸檬園和菠蘿種植園，是孟加拉著名的產茶區。當日除了看茶園之外還入村採風訪俗，並且遊走了勞娃渣拉國家公園(Lawachara National Park ) ，但全日都冇乜特別新鮮見識之處，可謂收獲平平。

首先參觀一條村，這是村口道旁的無業遊民，應該不是靜坐佔中爭取真普選啩。

師奶們都好得閒，並且同我娘親祖國的同胞一樣：踎功和腳力非常之了得。男青年在陽光下也顯得十分悠閒。

河邊的洗衫婦、編筐阿伯、泥工咕喱等勞動人民就冇咁好命水，要好勤力先揾到二餐。

男紡紗唻女織布。

茶室叫 Tee cabin。

長尾雀和小羊羔。

                      街市賣魚佬。

乜魚？鯰魚？細嗰隻呢？金槍魚毛？睇吓鯰魚個鰓，幾新鮮！

乜瓜？節瓜？勝瓜？葫蘆瓜？定係薄瓜瓜？

乜瓜？依個行路人識：矮瓜！

乜豆？蠶豆？碗豆？缸豆？眉豆？紅豆？綠豆？荷籣豆？

紅椰菜和綠椰菜。

芥菜頭和蘿蔔頭。

平啲俾你啦！

大平賣啦喂！

椰子有大有細，有生有熟。依兩隻都好正，買一送一。

唔明點解個街市伯鬍鬚雪白却有成頭黑髮。不過阿伯好醒目，你唔好諗住揾人笨，蝦老人家呀！

唔記得依個Town個名，唔通就係「斯里芒果」，唔理叫乜名，總之晌依處食午餐。就咁個小鎮，一樣都要塞車，街上小型宣傳車，三輪車仲行得，我哋旅遊巴就行唔到也哥哥。盛裝的女人們趁交通阻塞，施施然在車龍間穿行。

火車站和火車時刻表，班次都唔少，不過開往目的地和票價都唔識睇。

午餐食咗的乜一早唔記得，餐後就去參觀一個茶園，由於採茶季節已過，茶園中未見一個茶農，水靜河飛，除了見到幾個拾柴禾的女人之外，再就是見到樹梢上有幾隻長尾白眼白唇的猴子跳過來飛過去。到網上借住張採茶姑娘嘅相頂檔。

***

啲女人個個頭頂功夫都係一流，唔單止拾柴咁間單。

獁瑙一見有人行過來就表演空中飛猴，瞬間不見踪影。

鳳梨園。

乜花？唔知，要問吓澳洲喂先生先得。

看罷茶園後再去參觀一個由國際慈善團體助建的模範村，這個慈善組織名曰：Habitat for Humanity，中文不知是否可譯為「仁愛之家」。看第二張相的布招下方幾行小字，又是美國的環球鄉村Team、又是澳洲的仁愛之家，仲有我娘親祖國也有這個仁愛之家，好巴閉。過前幾日有單新聞，在山西省還是甚麼地方，一個小童的雙眼眼珠被人剜走了，無論其目的是甚麼，實在喪盡天良，還有甚麼仁愛可言。我哋香港也有一單，一個私生子的生母，為呃保險，買了重保後二個月將個BB送返大陸，結果「嘔奶」死咗。仲有一單，一對僱主將所僱的印傭打到遍體鱗傷，唔單止打，仲要用燙斗直接烙向印傭的皮膚，豈止不仁愛，直情殘忍！用燙斗烙傭人的新聞在香港時不時就見一單，行路人實在不能理解，你對個工人嘅工作表現不滿意，炒咗佢換一個咪得咯，駛乜出到燙斗這類冇人性的刑具啊！更使行路人不能理解的是，我哋香港地嘅傳媒也好、輿論也好，對於虐傭的反應和迴響遠不如虐畜虐狗虐貓的反應和迴響大。前些日子仲有呼聲要求政府組建『動物警察』，實在搞笑，要建都建『護傭警察』先啦！

羊BB。我哋個旅遊巴司機哥哥都玩埋一份。

不管黑羊白羊，有奶便是娘。

不管黑雞白雞，能生蛋能護仔就是好雞。

不管黃牛水牛，有奶喂仔就是好牛。

不管後生女人年老女人，就算冇奶喂仔但只要仁愛慈祥不虐傭就是好女人。

這個TRIPURA手工業中心的贊助者W.N.C.S.B. 又唔知係乜水。

今晚就要住宿依啲茅屋。有兩間磚房，俾我哋兩公婆一間，算係照顧。入到去一睇，全室都散發一陣霉味，個被舖黑麻麻且溼乎乎不忍卒睹，老公沖完涼提前換上次日要着的乾淨衫，再着番件厚外褸、套上牛仔褲，成晚唔用佢個被，係咁「和衣而睡」過了一宵，此乃全程中感覺最糟糕的一間酒店。

酒店名曰「NISHORGO LITCHIBARI ECO COTTAGE」，個Logo嘜頭與我等次日要去的勞娃渣拉國家公園相同，顯然是該國家公園自設的客棧。Cottage這個字可作小別墅解，也可作農舍解，這個客棧只能作農舍解了。況且房間都唔夠，得番二間磚房、三間茅屋，我等十三人需七間房，所以四位單身男丁還要車落去坡下住。不過坡下兩間房座落在一個小湖邊，風景都算唔錯，屋前有好幾棵大樹菠蘿，原來大樹菠蘿個BB係咁樣嘅。

Day 9. 睏得唔好，一早起身，見到沖涼嘅熱水爐Tin按裝在牆外，個標牌上寫住可裝30公升熱水、保用三年咁話，早知咁大隻Tin噚晚沖涼唔駛因住因住怕唔夠水啦！

因為農舍客棧本就座落在國家公園內，今天上午就是遊花園，首先穿過晨光射入來的竹林。

再迎着晨曦進入已經不太原始的原始森林。

熱帶雨林Feel。

公園專業導遊帶我哋睇雀仔，道友們一個二個傻更更仰頭揾雀仔。

林中紅毛泥指路石就來斷咁滯。

「乜蝴蝶？」「唔知，好醜樣。」「醜樣仲影？」「冇乜嘢影，好過冇。」

乜果？唔知，唔似果，似花籽。

勞娃渣拉國家公園基本資料。該公園坐落在Kamalganj Upazila，毛爾維紮爾區 的東北部。Lawachara國家公園佔地約1,250公頃，分佈著熱帶和亞熱帶濕潤闊葉林的生物群落。

依棵樹有啲講究，不過個Guide講咗之後行路人就唔記得晒。

林中居然有小火車通過，咁仲會有乜野生動物留低啊！

林中Coffee shop。係了，此地唔叫Shop叫Cabin。

依隻蝴蝶都係咁醜樣，似飛蛾多啲。

全陪個Guide唔想兜路，要一步躍過林中一條小溪，仲要行路人先過去幫佢影低，卒之都係功虧一簣，整濕咗對鞋。

依間高腳鐵皮屋又有講究，好似係一位當地的直升機師居住，至於為何該機師要住咁間屋，行路人未聽全，不甚了了。

遊罷森林公園順便遊埋附近的一條村，這是村外的一間吊腳樓，頗有啲原始Feel。入村先要穿過一個竹林拱門。

村中小學校，課室冇門冇窗。這是學生和老師。

木柴先要透風曬乾。

此地盛產檳榔葉，包住石灰供人來提神。

村中小屁孩兒。

出村後在林中見到一塊標牌，話有咁多野生動物捿身在園內，但我等除咗見到二隻唔似飛蛾唔似蝴蝶嘅昆虫，其它動物連條毛也未見過。這個國家公園睇唔睇都罷啦。

食罷午餐就打道回府，返首都達卡。誰知一到達卡又撞到示威遊行。

此位在遊行隊伍中站在敞蓬汽車上口中唸唸有詞的人物唔知乜來頭，宗教領袖？大學教授？

遊行顯然影響民生，肯定要影響到乞兒婆的收入。唔怪得之雷教授話佔中一日香港經濟損失16億。所以話，戴律師搞佔中乃是香港的千古罪人，罪該萬死！不殺不足以平民憤，更不足以平黨憤，殺咗都係死有餘辜，遺臭萬年！

『窮人的孩子早當家』。所以一定唔可以俾孩子們去遊行、去佔中、去燭光晚會等等，因為佢哋要當家唔得閒。

高高在上的感覺總是好好的，無怪乎咁多人鍾意做高官，好似陳阿波，咁多人鬧佢，佢都賴死唔走，笑罵由人，高官我自為之。佢嘅梁波士也是一路貨色，因為佢哋都唔需要向香港市民問責，只需向一個人問責：陳阿波向689問責、689向老太爺問責，你吹咩！