孟加拉國之旅 6‧被揾笨續篇

如前一篇中所述，以下十條乃是行路人將老公在機場搭龍運巴士返屋企途中失態而大發雷霆時所講的一番說話，按時序歸納總結成十條，說話仍是用佢第一人稱的原話，但凡有行路人當時(在車上) 的插話或事後的夾叙夾議，均會用括號加星號註明。嗱嗱聲償還掉《K十條》這筆舊債先，否則老公詐起型上來都幾煩人。此《十條》文字不計標點達萬七餘字，凡唔鍾意睇本博文字的看官可略過，直接拖到下面睇孟加拉啲相，此萬七字與孟加拉之旅完全無關。

一，K先生話：……我對於飛機上嘅座位一向都無乜所謂，不但止對於是坐窗口位定係路口位此類婆乸問題無所謂，對於兩公婆是否坐埋一起也都無所謂，因為在我而言那只不過是幾個鐘最多十幾個鐘的事情，又唔係買樓長住，安身立命。更何況如果班機Full嘅話，每個座位終歸都要有人坐，你覺得個位唔好要與旁人換，就等於要把自已的壞東西去換他人的好東西咁自私、咁明火執杖形同打劫。如果班機冇Full到，咁就好易解決啦，你唔鍾意Check in時劃個位，自已去揾個滿意嘅位咪得囉。你(**指行路人) 成日都唔同我坐埋一起嘅啦，一上機見到班機唔Full，『著』一聲就唔見咗人，都唔知閃咗去邊坐，周不時都要到落機先蒲頭。不過咁，既然係跟團旅行，就算係短短數日或者十零八個人都好，一到機場集合之後，就意味咗開始了一種不同於自已晌屋企的團體生活，思想觀念上要自覺地具備一種集體觀念、團隊精神，要服從指揮聽安排，不可再事事、處處都一事當前，先替自已打算，自已想點就點。基於此種觀念和精神(其實也談不上甚麼精神咁高嘅境界，不過是一種常識性嘅倫理道德、淺顯嘅做人道理而已) ，只不過就算我唔在乎座位問題，唔在乎兩公婆是否坐埋一起，但我仍都會服從團體嘅安排。此次去車臣，晌赤鱲角機場出發時，Check in劃位後，盡管我仲未食晚飯，好心急入閘去環亞嘅Lounge食免費餐，但係我仍然都會將登機牌交俾主事人統一安排，重新劃位，並且企埋一邊耐心等候。依嘅就叫做下級服從上級，個人服從集體，小道理服從大道理。就算我並不介意兩公婆座位唔相連、我也都唔介意同任何人坐隔籬，我並無重新劃位嘅要求，但係畢竟有啲人好介意，會有此要求，我服從吓領導統一安排，可以幫到人，又何樂而不為哉！所以去時在香港飛莫斯科依一程統一安排，由領導重新劃位一啲問題都冇，一路順風。((**行路人按：此次去車臣來回都搭國泰航班在莫斯科轉機，國泰一向當啲團體機票客係二奶仔，唔俾入Miles先唔講，且不能晌網上事先Check in劃位，而Airline一早同你劃定嘅位又唔照你訂機票時遞交嘅Name list排位，劃到亂晒籠，兩公婆時時都一個坐尖沙嘴一個坐筲箕灣，所以在機場Check in之後，通常主事人都要收集起登機牌重新排位，此種情形在跟團旅行中也都屢見不鮮，不足為怪。但許多港人仍都係鍾意出埠時搭國泰或港龍嘅航班，以為這是我哋香港人自已的航空公司，同聲同氣咁話。其實正是所謂自已的乜乜公司仲衰，行路人出埠就最憎搭國泰，去歐洲寧可搭英航法航德航和俄航，空姐空少冇國泰嗰啲後生漂亮又有乜所謂，又唔係揀女婿娶新抱。國泰的飛機餐差劣難食、椅背電視屏幕細過iPad且唔講，最衰嘅就係座位窄到膝頭哥頂住前排座椅，依嘅就係自已人的乜乜公司嘅好處了，因為唯有自已人先最知道如何對自已友賺到盡。前一排被行路人鬧到豬狗不如的那間斐濟太平洋航空公司至少座位寬敞舒服，我等加埋領隊剛夠十個人出的團體機票，也照樣可以事前晌網上劃位，而且唔駛我地自已上網做，領隊Paul哥一早就按名單需要連回程機票的劃位都在出發前做定搞掂晒了。所以大陸網友話哉：這個世界沒有最衰，只有更衰！)) (( **行路人替K先生在上述第一條中所說的話歸納總結為：對飛機座位無乜要求，對是否要重新統一劃位也無可無不可，但一定會服從團領導安排。))

 二，K先生話：……到行程結束，最後一程晌莫斯科搭國泰嘅回程航班返港。於莫斯科機場Check in攞到登機牌後，我專等面對面大聲問(因為隔住個櫃位)主事人P先生：「仲駛唔駛交登機牌統一劃位？」P生答曰：「你哋唔需要重新劃位嘅就自已入閘先啦」。正中下懷！因為今朝早餐之後就去紅場遊蕩影相，跟往返酒店房沖個涼就來機場，一路到此刻都未食過嘢。當時咁問Ｐ生時在場的除咗我哋兩公婆之外仲有C生C太同埋W生W太，共六人，之後我等六人便一起入閘去揾Lounge食嘢。((**行路人按：K先生在此第二條中所講的這段話係欲表明，佢係經過領導批準而離開唔參加重新劃位嘅。))

 三，K先生話：……到了上一層好快就揾到Lounge食嘢，雖然莫斯科機場嘅Lounge唔係好多嘢食，但因為晏晝冇食Lunch，正好肚餓，所以也照樣大擦一餐，無論蒸嘅炸嘅、甜嘅鹹嘅、凍嘅熱嘅乜都試吓，仲飲咗杯白酒(俄國佬都係酒鬼，所以每人可免費飲杯含酒精飲料，第二杯就要收錢)，酒足飯飽之後，跟住就飯氣攻心，於是就攤晌大沙發上瞓覺。點知啱啱瞓咗一陣，就突然被C生、C太拍醒，仲以為夠鐘登機，原來C生C太一早食完嘢落樓去咗候機室，此刻又被主事者派上來向我倆公婆索取登機證話要統一劃位，我話「頭先咪已經同P生講咗囉，我倆公婆唔需要再重新安排嘅嘛！」C生話「唔得，依家又話要全部重新編排，就爭你兩位了。」既然咁講，也都冇辦法，唯有服從領導命令，好似死鬼林彪元帥話齋：『對毛主席的指示，理解的要執行，不理解的也要執行，在執行的過程中加深理解』！但係我因為着住件獵裝背心，裡外好多袋，張登機牌唔知塞咗去邊，當時又睡眼睲鬆十分忟憎(一是忟憎剛瞓咗就被C生搞醒，二是忟憎做領導嘅出爾反爾、講說話冇口齒) ，抄來抄去抄咗好耐先抄到張登機牌，但此時郤又唔見咗你(**指行路人) ，偌大間Lounge得番兩間房，中間用大玻璃隔開，一眼望晒都唔見你人，斷估都係去咗洗手間梳洗。如果當時你在場，我也就同你攞咗張你嘅登機牌一齊交俾C生打發佢地去交差了事。點知又唔見咗你人，我自己已經好忟憎，仲要我去女廁揾你，依一刻真如北京話所說『氣兒就不打一處來』，一怒之下就請C生C太落樓話俾領導知「我倆堅持唔需要重新編位，就坐自已嘅位」，等佢倆落樓去覆命後，都仲唔見你返來，於是我就繼續瞓低攤屍……。((*行路人按：Ｋ先生在此第三條中所講的說話，已表明事情正在起變化，開始令到佢唔Likes，開始令到佢忟憎……)) 。((PS：持香港銀行派嘅PP卡晌全球幾乎所有國際機場的貴賓候機室都可以食嘢、沖涼、瞓覺唔駛錢，所以老公一到機場，去揾可使用PP卡嘅Lounge位置，遠遠着緊過上機坐乜座位，因為佢話「唔食你就蝕底，依啲唔係免費午餐，係你間銀行幫你俾咗錢，銀行用咩錢俾呀，就係用你自已嘅錢俾囉」，佢雖然唔係香港出世，但周身充滿咗香港人唔執輸、唔蝕底嘅基因。))

 四，K先生話：……點知又係啱啱瞓着咗，即刻又再俾人拍醒。依次係由領導Ｐ佢自已親自出馬(由於佢都唔知個Lounge晌邊，所以都係由C生C太帶領上來)，佢哋三位再一次搞醒我之後，同我講嘅第一句說話係乜，因為當其時我瞓到烏吓烏吓已經唔記得，總之係要攞我倆的登機牌座位號俾佢哋重新編排，我因為二度被人擾我清夢，十分之抵觸與抗拒，所以講說話嘅語氣顯得好唔耐煩：「唔係已經講咗我哋唔需要重新編嘅啦，你都同意架！」「唔係唻，唔係咁架，依家唔夠位調配，如果你兩位唔參加就搞唔掂架啦，你就算當幫吓我啦……」作為領導的主事者P先生，直情係央求我幫佢解決難題，說話講到依一步，我仲有咩可講？人哋冇直接命令你將登機牌交出來，冇當你係下屬，即當你係朋友先出聲求你，就算你當時再點樣忟憎、再點樣唔Likes，你都唔好意思繼續托人手肘啦，係咪？唯有同你(**指行路人) 一齊乖乖地交出兩張登記證的座位號……。佢哋三位達到目的之後即時走人，我則冇可能再瞓得着，心諗：有乜吔大不了的難題啫？乜就係一個座位問題，有咩搞唔掂啫？總之30個人30個位，人人都有位坐，所謂唔夠位調配，無非就係唔夠相連位俾分開坐嘅兩公婆坐埋一齊，咁如果實在唔夠位就分開坐囉，都唔駛十個鐘，咁都非要黐埋一齊不可？十個鐘之後返到屋企！你日日24個鐘都攬埋唔放手都得啦！何必仲要難為領導自已赤膊上陣低聲下氣去求人咁Cheap！當時我仲以為除咗我倆公婆座位冇晌一齊之外，至少仲有一Pair(甚至二Pair)夫婦未能坐埋一齊。唉，唯有當係一開始就規定必須統一編位，咁仲要企响下面唔知等幾耐，依家橫惦都己經食飽，由得佢哋去編到夠啦！———唯有如此自已安慰自已。((**行路人按：照K先生在下面第六條中所講，他在此第四條中所講嘅，在交出兩張登機證的座位號時已經上當受騙了，只不過佢自已唔知，行路人我也都唔知(當時我已經從廁所返回到該騙局的案發現場) ，我倆仲以為幫到領導解決咗難題，儘管有啲忟憎，也都冇乜大不了。))

 五， K先生話：……橫惦被搞到冇得瞓咯，於是執起手提行李也落樓去候機閘口。落到去見到已經開閘，旅客正排隊魚貫登機，點知我哋成班團友却仍然都集中坐埋一齊，仲晌度等候領導重新編位。實在是匪夷所思！叫人納悶嘅係：佢哋攞住我倆送出的座位號一早已經落樓，就算係仲有1至2 Pair夫婦未能坐埋一齊，攞到我哋兩個座位之後能否幫到解決問題，一望就知，又唔係『哥德巴赫猜想』之類嘅世界數學難題，如果俾我來搞，唔駛半分鐘就搞惦佢啦：新增二個位如果有助於解決那一二Pair非要坐埋一起的夫婦，就為其解決之，如幫唔到也都冇辦法，好似你(**指行路人) 個個位一邊係走廊，另一邊係唔識的街外人，完全無助於解決問題，乃廢票一張，當然依一層也都係登機之後先知……。不過此時我自忖，既然已經將自已座位貢獻俾領導了，佢鍾意點搞就由得佢去搞，唔關我事，始終都會俾個位我坐，於是企埋一邊，耐心地等領導派個位俾我之後就上機。我倚往條柱冷眼旁觀，只見領導人P先生一手揸住張名單，一手揸住支筆，企晌眾人面前圈圈劃劃，雙眉緊鎖好似真嘅咁晌解緊一道世界難題，同時也有人企晌佢側邊指指點點，好似教緊佢如何解開依道難題，實在可笑之至。依邊厢遲遲解唔開依道世界難題，那邊厢閘口乘客却已經上得七七八八，開始催未登機嘅旅客快啲登機。此一刻我突然醒起國泰嘅返港航班上會有隔夜嘅港報睇，但係遲咗報紙派完就冇得睇，可是依邊的世界難題睇起上來一時半時又無望解開，好似捉棋捉到咗殘局，有人出矛將來將去唔知幾時先將得死。此時我實在忍耐不住，一派英雄就義嘅款行過去同領導講：「嗱，人哋嗰邊催登機，你搞咁耐仲未搞惦，究竟有乜問題啫？如果因為有啲位冇人願意坐而令到仲有倆公婆無辦法安排坐埋一起嘅話，嗰個最差、最衰、最冇人肯坐嘅位，俾我來坐，拎我倆公婆嘅位出來調俾人哋好想坐埋一齊嘅倆公婆坐，咁得未啊！」講完我就好勞氣咁轉身仍去倚住條柱企晌度等，當然也並未表露自已當時係急於登機去攞報紙睇，因為知道急都冇用，我淨係想表達吓自已的對此事此態嘅不滿乃至不屑，甚至鄙視！又過去咗五分鐘，仲未搞惦。我真係頂唔順了，於是再一次行過去，對領導P講「上得機未啊？人哋都全部上晒咯！」P生居然望都唔望我一眼，仍係揸住支筆自已低頭指住張紙比比劃劃咁答我：「就係唔想要你去坐咁遠。」當時我完全冇去諗吓佢依句說話的含義，一味急於上機攞報紙睇，所以就答佢：「是旦啦！人哋催我哋登機呀！」於是P生就順水推舟宣佈：「咁大家上機先啦，上咗機先講。」直到登機此一刻，我倆公婆都尚未知道上機之後應該去坐邊個位，唯有暫時先朝自已登機牌上原本劃的位行過去(企晌入口處的空姐都要查登機證並指示你行佢左邊定係右邊的走廊，你唔想朝自已個位行都唔得)……((**行路人按：K先生以上這段說話中嘅場合，行路人全都在場，不過老公唔許我出聲，叫我遠遠哋去揾個位坐低。不過佢自已一聽P生話「上咗機先講」就即刻趕住去投胎咁衝去閘口登機，搞到我跟都跟唔切，卒之上咗機後令到我哋兩公婆失散咗三個幾鐘……。))

 六， K先生繼續講：……上機一路行到自已個位，赫然見到自已個位已經被人占據，依嘅倒是並不奇怪，因為座位由領導重新編排過，問題係到此一刻都仍然唔知自已被編排去邊度坐，就算係欽犯林冲發配滄州充軍，都有個山神廟蔽體啦，報紙又冇得睇，咁遲先上機，預咗佢一早派晒嘅啦！真TMD窩囊透頂！((**行路人按：佢用北京話講咗句粗口)) 當時唯有拎住手提行李，企晌自已座位前嘅走廊上等候朝廷發落。空姐行來行去，幾次叫我唔好阻往通道，責令我快啲揾自已嘅位坐低，我唯有對空姐陪笑臉、Say sorry，並且呃佢登機證交咗俾領隊咁話。我心諗，我都想快啲揾自已位坐低咯，問題原本嘅自已位已經俾人占領咗，依家都唔知邊度係自已位。此時此刻真係又有啲舊年去菲濟『中秋落難』嘅感覺，自已都自已覺得好陰功。此還不特止，因為我發覺我獻出的位已被人佔據雖然唔出奇，奇怪嘅係與之相鄰坐嘅既非如我倆一般嘅合法夫妻兩公婆，也非晌本Trip中的同房嘅Room mate。而是兩位年富力壯、身體健康、完全冇需要照顧的中年團友，此一刻正大刺刺地坐在那裡有講有笑。我這才意識到自已獻出的屁股肉並非用於幫人救命補瘡，而係俾人用來煲人肉湯飲。此一瞬間，立時有一種吞咗半隻死老鼠般嘅噁心、翻胃……。盡管如此，我都算好嘢，完全未動聲色，因為到此一刻，雖然吞咗死老鼠，雖然屁股仍晌度淌血，我都要强令自已忍住依啖氣，因為雖然我倆本來座位就唔係一起，也冇要求安排在一起，但此一刻你我兩人都唔知編派去邊坐，萬一到時領導將我倆公婆安排到某個相連位坐，就唔應該再有咩說話可講，因為冇俾頭啖湯你飲，都算留番啲人肉湯渣俾你。所以到此一刻，我都並未有要為此發飈嘅打算，我做嘢好穩陣，歌仔都有得唱啦：『未到最後的時候，決不輕言戰斗。』就算係後發制人，你都必須保證自已係立足於道德高地，先可以出手。那麽何時我先有發飈的打算？那是在三四個小時之後，依家唔講住，一陣間先講。講番我正在噁心翻胃之時，領導P先生响機尾出現了，說是為我「揾咗個位」，叫我行過去，係最尾一行角落頭個位。該機好似係波音737，經濟艙座位是雙走廊、2-3-2排列，但最尾一行冇中間三個位，因為機尾的備餐間從中間凸咗出來。P生替我揾嘅位(其實駛乜『揾』唧，一早就知道存在依個位嘅啦！我事後回想起來，上機前P生曾經眼都唔望住我却對我講：「唔想你坐去咁遠」，哈！咁應該就係指依個位囉，仲需要揾咩！扮晒嘢！) 依個係尾排靠右舷窗嘅位。前面已經講過，上飛機坐乜位，同邊個坐之類，我根本就無所謂，同靚模周秀娜坐固然好，同余慕蓮甚至夏蕙姨坐都唔拘，就算同斯諾登甚至同拉登坐仲好，我都可以同佢哋傾到偈、學到嘢，甚至可以傾天光唔駛瞓。但係此時隔籬的走廊位已經坐咗一位唔係團友、大概35至40歲上下嘅女士，雖然肥肥地也唔靚(*後尾抵港排隊入境時有位團友問我：聽P生話，噚晚揾咗位靚女陪你喎，係咪啊？〈——哇！咁樣講都得？依種說話應該走去問上海法院民事庭的庭長、副庭長等三位啱啱被『雙開』嘅法官，因為法院大樓的承建商噚晚揾咗三位靚女陪三位法官。〉 我答：如此靚女，下次請領導留番俾自已享用罷啦！) 但係話是話，個女人畢竟都後生過我，雖無驚艷之喜，但都並不抗拒。但不知何故，P生却未等我坐低，趁我舉手提袋入行李艙之時即刻就閃咗。等我裝罷行李轉頭已經不見人影。依個時候問題却來了，頭先P生引我到座位前指個位俾我時，我已經發覺個女人面露不悅之色，或許佢以為尾排尾座冇人，將她一個與座位差唔多Size的白色手袋放在側邊依個冇人的座位上。通常在此種情形下有人來坐，你應該收起個手袋，就算唔起身也都應該側側身俾人行入去，孰不知依位「靚女」唔知乃何方神聖，當我放好手提行李就企於佢面前意欲行入那個領導『揾』俾我個位時，靚女居然無動於衷，眼光直視前方，當我冇到。塊面孔板板六十四，好似全世界都「爭佢多還佢少」咁款，K某雖然行走世界，形形式式各種女人見過不知凡幾，但在此種情勢下也都不敢造次，並非我細膽或者怕女人，而真正係因為自已底氣不足，因為我袋中的登機牌仍是朝前六七行那個已經被他人占領咗嘅那個座位號，而萬一眼前依個座位真係靚女自已嘅(有人上機買兩個位並不新鮮) 或者有朋友尚未登機，我又並不能百分百Sure該位是否真係屬於我等三十個位中之一，因為我並冇從P生處見到過依個座位號嘅登記牌，何況全機尾三行中無一位係自已團友，依一層不可不防，萬一爭執起上來，搞到召來空姐判解，人哋靚女施施然掏出兩張依兩個位嘅登記證，而我却冇，豈非上海話所講：『弄到一眼落場勢也嘸沒，坍台坍到陸家浜』！Ｋ某從不打無把握之仗，更何況先賢講過『好男不同女斗』。所以此一刻就想起應該求助領導(在大陸叫依靠黨組織) ，但一轉頭黨代表P先生早已閃得無影無蹤，這真叫人進退兩難，腦中像當年港澳辦白頭魯平那樣連呼三個『怎麽辦』，空姐又十分討厭地來催命叫人坐低，到此一刻已無路可行，唯有硬着頭皮以柔克剛：柔性闖關。但在闖之前思想上也都作了最壞打算：只要個靚女一出聲話兩個位都係佢嘅，我就會唔等佢摸出二張飛，立即講聲對唔住、二話不說便棄甲而逃。因為我不能肯定依個位是否真的屬於佢嘅，但我可以肯定依個位本來就唔係屬於我嘅，只不過係領導幫我『揾』嘅，我冇權也都冇義務去查測人哋嘅登機牌，我只可以出示自已嘅登機牌證明依個位係我嘅，但係我冇牌(所以會俾空姐當冇牌小販咁喝趕) ，所以三十六計走為上計，再糾纏落去分分鐘自討沒趣落唔到台，到嗰時唔去找黨組織都唔得啦！就算個領導暱埋廁所都要抄番佢出來啦！不過在柔闖行動之前趁靚女面朝前方目不斜視之際，我先把靚女從頭到膝(脚睇唔到) 打量一番，因為首先需要判斷佢嘅國藉，邊處鄉下，方能決定用何種語言與之溝通，但係靚女仲戴住個口罩(心諗千祈唔好有中東呼吸綜合症啊) ，好難睇得真，嘴、鼻和腮頰都睇唔到，但係憑所能睇到嘅雙眼，額頭、皮膚和頭髮(包括髮質及顏色) ，已可以斷定此女人肯定唔係南方人，甚至于唔係北緯40度以南之華北或中原地區人氏，好有可能係蒙古人，也有可能係分布在俄羅斯東西伯利亞和遠東地區的少數民族(好比舊年勘察加之旅中晌雅庫斯克見到嘅雅庫族人) ，或者也都有可能係我哋祖國同胞，例如清廷葉赫那拉氏嘅後裔即女真人，甚至漠北邊陲嘅赫哲族或者鄂倫春族之類。如果系祖國同胞則易辦，Ｋ某能操流利普通話，如果係蒙古人或俄羅斯雅庫族人，我也都識幾句蒙古話或者俄文可以對付，但你確定唔到對方究竟是何國藉就唔可以亂來，卒之都係用番英文穩陣的，於是非常Gentleman地，面帶小小微笑，22度半嘅欠身彎腰姿勢向靚女輕輕聲講一句：Excuse me，孰知靚女繼續扮高竇，都係望都唔望我一眼，僅係微微側吓身，收起那白色手袋，雙脚膝頭本是垂直頂向前座，依家淨係斜轉咗45度，但我仍然唔能夠正常地行入去，此時心諗：哈！真未見過如此冇禮貌嘅女人，你如果真係生得靚就話齋，你不過係半老徐娘嘅蒙古師奶個樣，同阿叔扮晒嘢！況且此時Ｋ某已經心中有了底，你一側身嗰個座位已經可以肯定唔係你嘅，咁就唔晒客氣啦，我抬起脚就從佢大脾上方跨咗過去……。((**行路人按：Ｋ先生在此第六條中所講嘅主要係二點，首先係一上機就已經發現被人從屁股挖走的一嚿肉並非用於補瘡而係攞去煲湯飲；其次係終於衝破個怪女人嘅阻滯而坐到了全飛機最衰嘅一個座位上。))

 七，Ｋ先生繼續講：……真叫係一波未平一波又起，坐定之後問題又來了，頭先同個靚女大家各自運氣發功、進行無聲無形嘅思想交鋒，精神太集中未覺意一早就已經尿急，早知就去個洗手間返來先跨過佢大脾入座都未遲呀。依家就衰咗，頭先晌樓上Lounge食得太飽，又飲咗兩兜羅宋湯覺得有啲鹹，再加飲咗杯白酒更加頸渴，所以前後飲咗兩支水，兩杯熱檸茶，此刻坐定之後就尿急起上來，但又真係唔好意思即刻再向個女人開聲話要行出去洗手間。如果係自已團友就好說，但係撞到咁個女人，求先行入來嗰時人哋已經老大不願意，依家啱啱坐低又要出去，我自已都覺得有啲離譜。真如中共元老劉少奇話齋『老革命遇到了新問題』，搭飛機都唔知幾多次，從來未試過撞到咁樣事，咁樣嘅鄰坐，一時上還真係諗唔到辦法，唯有忍住先。真係多得佢P先生唔少，幫我『揾』咗咁個位，仲揾咗咁個『靚女』陪我。依家我直情搞成如《西厢記》中張生的唱詞：『我今是，水阻藍橋路不通』咁個局。今日點解會咁唔好彩，搞成咁，點算呢？北京人倒是有句俗話：『活人還能讓尿給憋死！』 冇錯，冇理由今晚成晚就咁困晌樊籠俾自已嘅尿急死，一定要諗條橋，點樣可以搞惦依個女人，打通藍橋去廁所。暫時唯有希望早D派餐，因為食完餐大家都會去個廁所先入睡，到時個女人一起身去洗手間我都可以跟住，先解決第一篤尿先，第二篤就見步行步再作道理……。長話短說，好唔容易等到派餐，派到我同個女人係最後兩個人，但却只剩低一盒飯，依個時間我知道機會來了，我毫不猶豫地扮出一副極之Gentleman個款，指住盒飯讓俾個女人食，唔記得盒飯係雞定係魚，個女人都唔係好鍾意，但係Last one，冇得揀，個女人唔鍾意都要食(我估佢上機前冇食嘢) ，我就再加多幾錢：「你快吃吧，半夜會肚子餓的呀，我上飛機前已經吃了晚飯的。」我用純正嘅普通話並且用適度溫柔體貼嘅語氣獻殷勤，但仍不失矜持和莊重。直到此一刻佢先除低口略為側身(最多10°) 微微頷首以示謝意，但眼光仍未正視過我一眼，而且基本上可以話仍無笑容。晌派餐時我聽到佢與空姐短短嘅幾句對話已經知道這是一位祖國同胞，普通話仲帶有好重嘅東北口音，仲係黑龍江口音。果然不出我之所料，十有八九是葉赫那拉氐的後代即 『在旗』，話唔定仲係個『格格』也未可知，不過可能性極微，如此冇禮貌唔識規矩嘅人都好難係大户人家出來。由於晌佢除低口罩之前我已經從佢嘅眼、額同埋頭髮就知道其長相與南邊遼寧吉林一帶嘅東北人唔同，一般分布响東北地區的漢人祖上多是山東人歷朝歷代「下關東」移民過去的，面相和型格都與土著滿族人有異。雖然溝女並非我嘅強項，但在理論上可以話已經頗為精通，實踐上也都有番咁幾道散手((**行路人插話：你唔駛謙虛了。))。第一步可說基本成功，去廁所疴第一篤尿以經在望。第二步點行晌腦中也已基本成形。晌依個時候輪到空姐滿面堆笑地同我Say sorry，話俾我件三文治代替盒飯頂住檔，或者同我加熱份聽朝嘅早餐好唔好？全都被我拒絕。我話不如你俾個杯麵我啦！空姐話後面冇杯麵，幫我去前面商務艙睇吓有冇。睇完返來都話冇。我問佢點解會唔夠餐派嘅？冇理由，通常地面上餐嘅數量都多過賣出機位嘅條數。姐姐話「係啊，今日我都覺得好奇怪，真係唔好意思……」。哈！咁都得，佢都好奇怪？不過今日算依位姐姐好彩，因為我上機之前真係晌機場個Lounge食得好飽，本來就打算一上機就瞓，冇諗往食嘢(*後尾落機後晌行李輸送帶前領導P先生話我「冇食到飛機餐而晌度發脾氣」，咁樣講若非別有用心、混淆視聽就係以小人之心度君子之腹———度我個食得好飽嘅『腹』。佢呃咗我嘅座位去獻俾完全唔需要照顧嘅人，換番個全飛機最衰嘅位掟咗我去坐，嗰個位點樣嘅衰法，我當然首先要講個位分分鐘冇飛機餐食囉，但唔等於我『發脾氣』就係因為冇食到飛機餐。其它諸如要睇人面色先入得去坐，坐低想疴尿仲要先諗計，點溝女之類我都未來得切講。更何妨我『發脾氣』嘅要害根本唔在於依個位衰唔衰，而在於被你呃咗！)，再加上依位空姐又確係年青貌美，你知我一向憐香惜玉((**行路人插話：依一層係事實，不過通常都晌出邊。)) 上唔夠餐都唔關佢事，人哋已經話對唔住咯，何況我一路都冇打算食嘢，如果唔係尿急我一早就去揾周公啦。因為本來就無心深究，所以我就叫個空姐將成個Tray(淨係有餐包、沙律同埋布丁，就係冇飯盒) 拎走，要佢同我整杯毡湯力，姐姐仔一聽即刻話『得得得，好快就來。』說罷端走個Tray就去後邊整個杯嘢，真係好快就送咗來，仲係用隻正式嘅玻璃杯唔係膠杯，杯上夾住兩片檸檬(通常淨係夾一片作裝飾耳) ，插咗飲管和攪棒，剩半罐湯力水外加三包花生，連埋餐巾整整齊齊另外用隻小托盤連埋盤一起交到我手上，十分之好笑容、好招呼，但我都淨係淡淡地講聲「唔該」算係謝過了。晌我開始飲嗰杯嘢時，個東北女人終於開腔同我講嘢，佢指住我杯嘢問：「這是不是杜松子酒？」，如果係平日我撞到依啲冇禮貌又唔靚嘅女人，我都唔會睬佢，最多哼哈一聲應付過去。你話了，佢第一次同我正式講嘢，仲係問我問題，你起碼前邊都要加『請問』兩個字啩！仲有啊，佢都唔係用手指來指吓我杯嘢，淨係對住杯嘢用下巴稍許抬一吓，表示問嘅係我嗰杯嘢，你話係咪一啲規矩都唔識？冇厘家教！((**行路人插話：唓！你又唔係同人地相睇、拍拖，駛乜講咁多規矩唧，理得人哋有冇家教！你唔係急尿要擦人鞋嘅咩？)) 乜就係，如果唔係急尿我睬佢都傻！((**行路人：咁跟住點啊，你講快啲啦！)) 我聽佢好冇禮貌咁問我係唔係杜松子酒，都唔知佢想表示佢都識嘢定係也都想來一杯飲吓，我就睇住尿急嘅份上，強打笑容應酬吓佢：「對，中文叫杜松子酒，香港人叫它Gin tonik，俄國人也挺喜歡喝這玩意兒，但多數再加伏特加一起喝。」跟住我就假扮殷勤：「要不要幫你叫一杯？」「不用不用，我很怕那種苦味兒。」唓！我就知佢不過係想表示吓自已識嘢嘅啦，馬屁未拍到，但她却打開了話盒子問我：「對了，你到底是北京人還是香港人？為什麽北京話和廣東話都講得很標準？」佢倒搶先查問起我嘅家宅，我避開佢第一個問題，直接答佢第二個問題：「我的北京話都可以算是OK，但真正的北京人一聽就知道我不是本地人，因為帶有江浙一帶口音。至於廣東話，真要多謝你是第一位誇我講得標準的，因為香港人都笑話我的廣東話很渣，渣就是很差，前兩天還被人笑話我『地址』和『弟子』不分。」「什麼意思？」「就是『住宅地址』的『地址』和『少林弟子』的『弟子』分不清。」「有甚麽不同？」「我也認為沒甚麽不同，但香港人非要說『地』字和『弟』字兩個字發音的聲調不一樣，地字要向前，弟字要向下，而且還示範發音給我聽，我聽來聽去也聽不出有什麼向前和向下的區別……」。從北京話廣東話依個話題開始，我就與依位冇禮貌嘅東北女人進入咗溝通程序，所謂溝女溝女無非就係相互能夠達到溝通的效果而已，不過我哋僅限於語言上的溝通……。((**行路人插話：依一點你唔駛解釋，晌飛機上邊就算你想做進一步其它嘅溝通都好難，就算你有依個賊心，諒你都冇依個賊贍！)) 咁又未必喎，如果二三十年前嘅吳家麗或者葉童坐响我隔離，咁就好難講！((**行路人註：老公後生時好鍾意依挺二三線明星，話佢地有女人味，令到男人有遐想等等。反而如林青霞、李嘉欣之類大美人，佢話『好似粒用洗潔精洗得好乾淨嘅話梅，仲有乜味道啊？』咁話。)) 你依家唔好扯依啲咁嘅廢話！((**行路人插話：你自已一路都响度講咁多廢話！咁你究竟疴咗尿未呢？我都同你尿急)) 未得住，因為仲未收晒的餐具餐盤，架餐車仲阻住晌通道中間，再講我仲要等個女人起身先，我先至可以跟住去，係咪？依個時間，嗰位靚女空姐，就係幫我整毡湯力嘅姐姐仔，揸住個茶壺同人添加茶水行過，俾我叫住：「唔該可唔可以幫我揾份報紙睇吓，人哋睇過嘅舊報紙都得。」「得，一陣我斟完茶幫你揾吓。」因為該姐姐爭我盒飯未俾，請佢揾份舊報紙依的嘢係冇難度嘅。佢好快就送來一份簇新冇人睇過嘅生果日報。國泰機真係唔到你唔服，上機嗰時我晌門口問過仲有冇報紙，話已經派晒了。我哋上機遲咗冇得講啦，點知到依家仲有全新冇人睇過嘅報紙，留番來做乜呢？唔通再運番香港退俾代理商收番錢？咁不如訂少啲貨啦，報紙依樣嘢上多上少冇人會話你，飯盒都上少咗唔夠派，咁就真係好出奇了。不過我當時有得報紙睇就算啦，唔理咁多嘢，也暫停與東北女人溝通，忍住尿埋頭睇報紙先。等我睇完份報紙，餐具已經收晒，機艙大燈也早已栓埋，大部份人已經入睡，唯少部份人仲睇緊電視，或者開咗電視瞓覺。到此一刻為止，嗰個女人居然一次都未起過身去洗手間，仲唔知幾時佢自已叫咗杯紅酒邊飲邊睇電視。嘿！依單去廁所嘅嘢還真係棘手，本來此時已經同佢溝通過一輪，同佢開聲話要去廁所已冇乜大問題，但我想把此『開聲』留番俾聽朝瞓醒後先用，即係話今晚第一次係『自然去』，聽朝第二次先『開聲去』。於是我就再有一搭冇一搭從講佢杯紅酒「味道怎麼樣？」開始，進入第二輪溝通，實施我嘅第二個擦鞋行動計劃。首先我從椅背袋中抄出份餐單，打開後指住聽朝早餐內容嘅部位要佢睇吓，同時我就對佢講：「明天早餐你想吃甚麽先挑好((**行路人按：國泰機早餐幾廿年如一日，無非係奄列加薯仔or炒麵二揀一)) ，一會我先去預訂好，否則明天送到咱們這兒又只剩下一種，沒選擇了」「飛機上有預訂的嗎？」人地都搭慣飛機，依一層呃唔到佢，但我一早就預咗佢咁問，於是答佢：「照例除了吃素或者回民吃清真飯可以預訂，不過也還要在訂機票時就聲明，否則上機才訂就不一定能滿足你要求。但咱們不是訂這些，你吃甚麼？炒蛋加土豆？好的，我要炒麵。一會兒我見到那個空姐就跟她說一聲，在前面派餐的時候就要留意每樣給咱們留一份，不要派光一種。剛才你都看見啦，那個空姐很好說話，因為今天晚上她欠我一頓飯……」，「嘻嘻……」個女人又點頭又笑出聲來表示同意我嘅講法，到此時佢個面部肌肉先至全部放鬆晒，明顯解除咗對我嘅敵意同埋全部警戒，我嘅溝女Plan B也宣告得以成功實施。((**行路人插話：你仲同佢左一個『咱們』右一個『咱們』好親熱添！)) 梗係啦，但係如果你要喝依啲醋嘅話就好Cheap嘅啦，直情係你自眨身價添！老實講，你後生時靚過佢好多。不過依家唔同你講依啲，講番繼續同佢溝通。佢嗰啲底牌、係乜背景晌依一輪溝通中俾我起得清清楚楚。佢鄉下係黑龍江雞西市，有冇聽過雞西嗰個地方？((**行路人：雞西煤礦？)) 啱！算你有番啲地理常識。就晌個度，先開煤礦後建市，個名又係雞又係西，廣東話讀就好難聽，不過既然出煤，就唔係窮地方。佢老竇係礦工，退休前已經升到礦長，唔駛落井掘煤，老母係礦上子弟小學老師，退休前都係老師，冇升校長副校長之類。但晌當地礦工圈子中已經可算係小康家庭，有能力供佢到北京讀到醫學院畢業，畢業後又自費到莫斯科留學，讀完碩士再讀博士，攞個博士學位算是海歸返來行醫，唔記得晌北京邊間醫院做醫生，點知中國唔承認俄國的醫學博士學位(佢講咗原因但我聽得唔係好明)，評定職稱時要佢降一級當碩士學歷評定，佢一氣之下劈炮唔撈，南下海南島揾食，好似做得唔錯，晌海口買咗間屋，將父母從最北邊嘅黑龍江接咗落來最南邊嘅海南島一齊過。但係佢做做吓又唔滿意，跳咗幾間公司，最後轉到深圳一間公司，係做醫療器材設備之類生意，此次就係帶住佢老板去莫斯科傾完生意返來，老板就坐前邊商務艙。仲有，因為讀得書多，高不成低不就，標梅已過，雲英未嫁，至今仍晌深圳小姑獨處，孤芳自賞。老竇老母仍晌海南島。依種女人通常都性情孤僻，成日如刺猬般張開利刺、一派防衛格局，但係你D刺再利也都經唔住我三兩度板斧就崩潰，如果唔係尿急，通常我依D板斧都唔會亮相，理得你嘅刺利唔利，上海話『勿睬儂頂兇！』到此時，飛機已經起飛三個幾鐘了，上機時我已經尿急，又急多咗三個幾鐘，此一刻係急到何等程度，不問可知，再忍落去唔係膀胱漲爆都會尿中毒咁滯啦。((**行路人插話：我就唔明了，急成咁樣，你就起身話要去廁所，唔通佢可以唔俾你去咩？)) 係，就算三個鐘前，我啱啱坐低就即刻又起身話要去廁所，佢都唔可以唔俾我去，但係唔好意思嘅嘛，我哋男人做唔出嘅嘛，又係咁樣個怪雞女人，如果你坐响隔籬，我一連去十次都唔怕啦！((**行路人：咁依家你已經同佢溝通咗咯，人哋仲未結婚都話咗俾你知咯，去個廁所仲有咩唔好意思啊，唔通你已經對人產生咗遐想，想博佢嘅好感？有冇留番個佢深圳小姑獨處嘅地址或者聯絡電話俾你啊？)) 廢話！我已經忍咗三個幾鐘了，唔慌再忍多陣，我都話咗要慳番一次『開聲去』俾聽朝先用嘅嘛，都跪咗九十九日咯，仲怕叩多個頭咩！((**行路人：咁究竟幾時先俾你去到疴到啊？真係俾你急死！)) 我依家都唔尿急咯，你急啲咩啫！……好唔容易等佢飲晒杯紅酒，終於起身，但係佢唔係去廁所喎，佢話去前面商務艙睇吓佢老板瞓咗未。我理得你去睇邊個，你去駕駛艙睇Captain都唔關我事，佢一起身我就跟住起身而且催佢：快點去吧，如果你老板還在看電視，就要他早點休息啦，已經很晚啦……。終於我都也可以去到廁所成功疴咗第一篤無比暢快嘅馬拉松長尿。((**行路人按：Ｋ先生晌依一大段講咗咁多嘢，主題只有一個：為咗疴篤尿而使盡渾身解數去溝女。))

 八，K先生話：……疴完長尿返來，見到個女人一早已經返回座位，而且仰頭靠在椅背上擘大個口瞓着咗咁。咁快就瞓咗？可能我篤尿疴得實在太耐，跟往又洗面刷牙，駛咗好多時間自已唔覺。不過依家唔駛擔心了，同個女人嘅關係已經進入友好階段，隨時都可以叫醒佢俾我行入去坐。不過此一刻啱啱用凍水洗過面，精神爽利，並唔急於行入去瞓。於是靜雞雞彎腰伸手入去自已座位前面個椅背袋，抽出嗰份睇完嘅生果日報，諗住攞俾你(**指行路人)睇，因為我知你都好關心時政，日日都睇報紙嘅。但係又唔知你坐咗去邊喎，於是就黑麻麻一個位一個位揾，從後艙一路揾到的前艙，行到商務艙再揾翻轉頭，再一行一行重新辨認一次，又行返到自已尾行個位，確信依條走廊兩邊肯定都冇你((**行路人插話：我就坐晌原本自已個位，响最尾三排中間嘅走廊位。)) 你唔好打斷我啦！依家我梗係知啦，當時我唔知嘅嘛！所以我穿過後面嘅備餐間行到對面條走廊，都係由尾行到頭，再由頭行返轉尾，都係揾唔到你，由於頭先晌依邊走廊行返來嗰時，見到團友M姐仲未瞓坐晌度出神，所以行過去問：「M姐，有冇見到我老婆坐晌邊度？」「呢，佢就坐晌阿邊個後邊自已個位囉！」我頭先行大圈時有見到「阿邊個」，所以即刻就揾到你俾份報紙你。原來你係用條毡蒙住個頭瞓，所以我行左兩大圈都見唔到……。晌依處我講依啲點去揾你、點俾報紙你全都無關宏旨，我所要講嘅係，晌我兜咗依兩個大圈的過程中，我見到了全部團友就係未見到你，而我又發現咗兩個問題，其一係全團全部兩公婆都被安排到坐咗相連位，而唯有我同你一Pair正式嘅合法夫妻未被安排到坐相連位；其二是領導P在上機前到Lounge來求我『當幫吓佢』嗰時，亦即晌我倆交出自已嘅二個座位之前，P先生手中已經掌握咗足夠嘅相連位分配俾兩夫婦坐，而且仲有多出兩個相連位，而多出嘅依兩個相連位最終係由領導P先生自已同另一位非同房的男團友坐。此時此刻我先知道P先生依個彌天大謊扯得有幾『彌天』，有幾無恥！而正就晌嗰一刻，我先決定依啖氣唔可以就咁吞落肚，一定唔可以沉默而要發飈，Why？

1.   P生來求我幫佢解決難題時，根本就不存在甚麼難題，因為除咗我兩公婆之外，其它兩公婆嘅相連位全部都已經解決，而且相連位仲有突。

2.   我倆公婆是在P生的批準之下自願唔需要安排雙連位而唔參加統一編位的。OK，就算依家P先生反悔，迫我倆一定要參加 (因為難題是根本不存在的，所謂『你就當幫吓我啦』也根本係扮可憐、係一種揾人笨的手段) ， 那麼行正路就係首先安排我倆坐相連位，你(**指行路人) 嘅位隔鄰係外人，冇得換，就攞你個位同坐我隔鄰的中年團友對換，即刻解決晒全部所需解決的問題，你P先生也仍然可以繼續坐嗰個多出來嘅相連位。

3.   冇錯，係我自告奮話邊個位最衰、最冇人肯坐，就俾我來坐。但係咁做嘅前提係幫你解決難題，依家發覺難題乃系子虛烏有根本就唔存在！晌候機室揸住支筆晌名單上圈圈點點，根本就係响度做戲，而且場戲根本就係做俾我兩公婆睇，因為所有其它人都已經唔存在問題，多出兩個相連位依一層已足以說明依一點。(或者也都有可能係我倆公婆晌前場睇，夾份設計圈套或者有份飲人肉湯嘅晌幕後睇)。事實上你(**指行路人) 嘅位根本冇用係廢嘅，所以P生一早撇低唔理，却又唔話你知派你去邊坐，又唔講叫你坐原位，搞到你上機後冇位坐，最終為此得罪咗人先能有位坐低，因為P先生已經完全唔記得晒你都係被佢攞走座位後需要重新安排嘅，因為你係張廢票冇貢獻，所以當你冇到，由得你自生自滅囉！Ｐ生佢嘅精神注意力當其時集中於割咗我舊屁股肉去獻俾人煲湯飲之後，就剩低如何發落我K某依個小小難題了，而此小難題其實也一早就已經設計好，經過一番假惺惺的『唔想叫你坐咁遠』嘅拙劣表演之後，卒之都係將我有咁遠掟咁遠。當然，順手也『揾咗個靚女』陪我，然後就閃得無影無蹤，話之你(**行路人) 有冇位坐啫！

((**Ｋ先生晌依個第八條中所講嘅嘢好緊要，因為佢搞清楚咗成個騙局嘅前前後後嘅因果關係及其演變邏輯，從而決定必須發飊：『狂飊為我從天落』……))

 九，K先生在此第九條中所講嘅說話，已經提前剪貼到上一篇中，主要係二點，一是不認同行路人將事件的性質簡單地歸結為『你請客，我惠鈔。』六個字。二是用了句『剜肉補瘡』的成語。此二點中K先生之立論乃基於：如果真嘅係去請客、去補瘡，要我惠鈔、要割我屁股肉冇問題，問題在於根本唔係去請客去補瘡！……。有看官未睇嘅可去睇上一篇，此處不再重覆。行路人我自已却想借此空檔作若干補充和說明。

1.   K先生响第八條中提及行路人在飛機上因座位而得罪咗人，被我得罪嘅就係前面佢也提到過的M姐。因為我上機後唔知坐邊度，上機前P先生話『上機先講』，但上機後一路都冇人理我，最尾冇辦法唯有行到自己個位，但係見到個位已經被M姐坐咗，我就話依個位係我嘅，M姐就乜都冇講起身走咗，收尾見到佢坐响我前二排的同樣位。就係咁件小事，人哋被我「得罪」嘅M姐都冇講乜，返來却被老公大鬧一餐：「你點可以咁架？人哋Ｍ姐咁好人氏，你點可以咁樣蝦人架！」「我點蝦人啫？」「你叫人起身俾你坐就係唔啱！咁冇禮貌嘅嘢你都做得出，你有冇家教架！」「你做乜咁樣話我啫？人哋Ｍ姐自已都未出聲！」「Ｍ姐咁嘅老實人佢梗係唔會出聲啦！成個Trip坐十幾日旅遊巴，佢全程都被人Pan到車尾坐，你都坐後邊，睇到架，佢有冇出過聲啊？依個世界，個個欺軟怕硬。你可以怕硬，但一定唔可以欺軟！欺軟蝦弱嘅人遲早都要遭報應嘅！」「點解你要咁樣咒我啫？你被人揾笨又唔關我事，做咩要攞我出氣喎！嗰個位本來就係我嘅嘛！」「邊個話係你架！我哋兩個位俾Ｐ生攞走咗，就代表參加咗統一調配，你就要服從Ｐ生安排嘅啦！或者你個座位有可能已經俾Ｐ生安排俾Ｍ姐坐呢，你咁樣趕咗人走，簡直不知所謂！」「但係Ｐ生冇同我講過喎，佢根本就冇理到我喎，我去邊坐啊？」「你就企晌度等囉，初初我都一路睇住人哋飲人肉湯，一路企响已經被人占領嘅坐位前等架。就算一路都冇人睬你，你就一路企晌度等，怕咩啫，未等飛機起飛一早就會有空姐過來干預嘅啦，到時咪你就對住全機艙大大聲話『我唔知坐邊度啊！』依個時間應該蒲頭嘅人自然會浮出水面來替你解決問題嘅啦，你驚冇位坐啊！你點可以去對Ｍ姐咁冇禮貌趕走人哋嘅呢？你哋啲女人真係「頭髮長見識短」，我就冇叫占我座位嘅人起身讓俾我坐咯，依嘅即係「有所為有所不為」，因為世上事有啲可以為有的唔可以為，尤其係Ｍ姐咁老實、咁本分、咁厚道嘅弱質女人，唔怕講，佢係我Ｋ某跟團上百次中所見到過嘅最值得尊敬嘅女人，你咁樣對人哋絕對係錯嘅，錯得好緊要添嗱！仲死撑……」

 各位看官，我老公被人揾笨，我自已都已經係受害人(上機冇位坐，淪為候補乘客) ，返來仲要俾佢鬧。而且佢發起脾氣上來乜都唔理，對住自已老婆大讚第個女人，忘乎所以，犯下做人丈夫之大忌。對行路人而來講，係唔係屬於『城門失火，殃及池魚』，百分之二百嘅無妄之災！依個車臣之行，真叫係『乘興而去，敗興而歸』！

 以上第六、第七、第八條此三條中所列之Ｋ先生所講的說話並非全部佢晌龍運巴士上所講，大約有40％係返到屋企陸陸續續補充講嘅，我歸納成文字後經過佢自已潤飾和補充先搞到如此冗長。因為佢睇到我上一篇中話要『去粗取精、去偽存真』，十分不滿，佢話：「粗啲唔怕，唔駛咁精，唔駛字字珠璣，唔係拎去出版社出書。嗱，我警告你啊，你唔好再立亂删減我講個說話啊！你唔駛同我講乜吔篇幅、乜吔版面。你唔好好似P生佢地咁當我係LuLu先得架！你以為我唔知啊，任何網站嘅Blog都冇篇幅限止嘅，你寫部百萬字嘅長篇小說Post上去，雅虎仲無任歡迎添嗱，因為佢唔駛俾版權費你，却又充實咗自已嘅免費資源庫。仲有啊，咩叫「去偽存真」啊？我有邊句說話係偽係假架？你以為我係梁振英搞語言偽術咩，我話你知，我句句都係真，決無虛言！何況其中有一半以上場合你都在場，你自已都好清楚我有冇講大話，有冇作故仔。邊有『偽』可以俾你『去』啊！你歸納嘅依十條，時間次序係啱嘅，由一至十我不過晌度『剝筍』，即係你所講嘅『由表及裡』(由表面講係補瘡，實際骨子裡却係煲湯)。識唔識『剝筍』啊？即係將個筍殼一層一層咁剝開，一路剝到嗰個已經爛透腐黑嘅筍心見光為止。另外『由此及彼』也都冇錯，好似我講咗好多關於點同個東北女人溝通嘅嘢，唔係無端端講，也都唔係為咗表示自已風流倜儻識溝女仔，係為咗要講Ｐ生同我揾個位同埋揾個陪我嘅女人有幾衰，何止食唔到飛機餐咁小兒科、咁小人之心！依個就係『由此及彼，明未？……」。所以，前面「六七八」三條由佢自已操刀修改補充後，篇幅至少加大了40-50％。

 十，Ｋ先生話：……成件事我到依家諗極都唔明，究竟係咩力量促使P先生做啲咁愚蠢嘅事呢、去設一個咁戇居嘅圈套呢？話佢愚蠢、戇居係因為一上機就會被人識破其謊言和騙局，從而再令人回想起佢地由頭到尾的拙劣且醜陋嘅表演，極之難睇。雖然你自以為得計，也可以一時得逞，割咗我嘅屁股肉去煲湯俾人飲。但係普世常識話俾我哋知，任何陰謀詭計，你可以得逞於一時一事，但唔可能事事時時都得逞，何況依件事前後不過一小時就已經被人識穿，咁你嘅「得着」究竟係乜嘢呢？依一層實在比『哥德巴赫猜想』仲要難猜。但係你嘅無形損失以及需要付出嘅延後代價却是顯而易見的，有啲甚至乎係立竿見影嘅。首當其衝就係令到我K某人『狂飊為我從天落』，你應該知道Ｋ某人並非一支慳電膽，北方話「不是一盞省油的燈」。如果為咗討好某啲人，滿足其無理要求而要令其它嘅某啲人皺眉、翻胃甚至深惡痛絕，而來搞咁一齣戲，犯得咗咩？大凡正常人都會計吓得失，完全可以計到條數係犯唔咗去做依一齣嘅。屋企個弱智仔都識咁諗啦，何況P先生咁行走江湖幾十年嘅世界仔。我Ｋ某曾經讀過幾本普及型的邏緝叢書，按照一般的「形式邏輯」來作推理係解釋唔到依齣戲嘅，不過我後生時好鍾意讀推理小說，平時晌生活中遇事也都喜歡玩吓「由此及彼、由表及裡」嘅推理或演譯。所以在反覆推理之下，覺得能夠令到Ｐ先生如此不顧後果地來做依一齣如此拙劣兼居嘅一齣戲，如果淨係因為「親疏有別」依個原因，去揾張三李四嘅笨以獻媚於王五趙六，此完全講唔通。Ｐ先生搞團帶團數以百次計，冇理由唔知道作為一個主事人、一個領導者，其行事準則嘅第一條就係公平公正公義、不偏不倚。無論係朋友又好、熟客或者新客都好，一抵達機場點名集合之後，即已經都是團友嘅身份，一律平等，冇人可享特權，原因好簡單，因為每一位團友所支付的使費都係相同的。退一萬步講，就算係團友中有一位係主事人嘅救命恩公，你為咗表示報恩或者孝順，完全可以自已另外出錢為其買張商務或頭等機票，對其加以特別照顧以顯其親而不疏，但冇理由要其它團友割嚿肉落來俾你拎去煲湯行孝或者報恩！所以推理來推理去唯有推到Last一層，即係史書上嘅一句說話：『千里為官只為財』。換言之：錢作怪。無論係Extra tips 定係 Under table money都好，如果(當然係如果) 真係存在的話，我都好想知道個銀碼究竟係幾多？料想「仟兒八百」應該唔足以令人為你去做依種Dirty job嘅，但若銀碼太大，開價要到「百八十萬」，Ｋ某還真係俾唔起。如果係「十萬八萬」Ｋ某仲可能負擔得起，但却覺得件事唔值依個價(我自已去搭商務位都唔駛咁貴)，若果係「萬兒八仟」可以搞惦嘅話，Ｋ某倒是都係願意下次試吓依個待遇，整一盅人肉延壽湯補吓身……。

 打理一個國家又好、一間公司又好、一個民間團體又好、乃至一個旅行團都好，作為負責嘅主事人至緊要辦事公道、公正。唔可以講大話呃人，否則就冇誠信，一位領導者如果失去了誠信，咁就如曾鈺成議長所講：陷入了那個甚麽思陀陷阱，蜜思佛陀陷阱？((**行路人插話：嗰個係化妝品牌子)) 總之係乜乜陀陷阱，意思係你講乜都冇人再信，同我哋常說的『狼來了』意思差唔多。民無信不立，失去大眾嘅信任即係不得人心，咁就舉步維艱，如何施政？响香港有辦睇，曾蔭權搞親疏有別，「得着」係咩呢，不過係碗豬骨粥，搞到去同黑道中人飲飲食食，收尾揹住個『貪曾』神主牌灰溜溜辭廟。梁振英更加不堪，用人非梁粉不親，未落台嘅要包庇，如陳阿波；落咗台嘅都要包庇，如嗰對已經辭職嘅行政會議嘅難兄難弟：阿林&阿張哥兒倆，搞到家下民望調查指數低處未算低，不知伊於胡底？咁樣搞落去仲有乜招數可出？上禮拜日自稱『微服出巡』(笑死人！用佢自已嘅說話講就係：「知道嘅俾你笑死，唔知嘅俾你嚇死！」因為令人以為末代皇帝死鬼溥儀復活或者陰魂不散，飄吓飄吓微服出巡添，係唔係嚇死人啊？都唔知佢特首府嘅衣櫃有冇件龍袍掛晌度？御膳房識唔識煮滿漢全席？) ，龍輦抵步上水後御駕要『屈駕』走後門，前門大道中間御林軍一字長蛇陣排開，分阻『反清復明』以及『扶清滅洋』兩路人馬，此還不足以維穩，仲要請土豪劣紳召來江湖上各路英雄染上金毛、戴住口罩黑超來護駕，但卒之都還要搞到大打出手六國大封相。『梁微服』退朝時其龍輦仲險些被反清分子用折凳擲中，諒必搞到龍輦內的龍顏大怒：「反了反了！叫孤家怎生是好？」。你話咁樣搞法點算好？！Ｋ某人真祈望毛太祖保佑梁微服和他的主子吧！至少保佑他有驚冇險地捱完依個任期，千祈唔好令佢嘅主子未等任期完結就亮個Plan B出來。Ｋ某晌飛機上亮出個Plan B可以溝女，可以去廁所暢疴啫，如果阿爺亮個Plan B出來就大劑，梁微服個脚會好痛！

 最尾，妨效一則大陸網上嘅政治『繞口令』段子，將其普通話改成廣東話並加多咗二句貼在此處，作為以上十條控訴狀的尾聲：

 『初初我哋唔知道佢哋晌度講大話呃人，但係佢哋自已知道係晌度講大話呃人，佢哋也都知道我哋唔知道佢地講大話呃人。不過好快我哋就知道咗佢哋講大話呃人，但佢哋仲以為我哋唔知道佢哋講大話呃人，卒之佢哋也都知道咗我哋已經知道佢哋講大話呃人，但係仲要裝做唔知道我哋已經知道咗佢哋講大話呃人……。』

 行路人終於還請《K十條》依單債務，繼續再還孟加拉之旅嘅債，有拖冇欠，長命功夫長命做，長命債也就長命還。上次講到第七天上畫晌印孟邊界影完『跨界相』後，返回那個疑似度假中心用午餐，並且幹掉了那三條疑似鰂魚。然後驅車去參觀一個水上砂石交易市場以及採石地盤。

依個水上砂石交易市場不知是屬於私人定係官家，主要是供應卵石和河砂，現採現賣，保證新鮮熱辣。

運一筐，領張牌，以便收工時計數收銀。砂石料在河對面，用船仔一船一船運過來，然後再由咕喱用竹筐一筐一筐頂在頭上運上岸裝車。

毒日之下做完依份苦工，就地用黄泥湯般的河水沖個涼。

我哋要搭船去對岸採石場。後一張相係同船擺渡的當地妹。

在船上所見到對岸河崖上民工過夜的工棚。

我等上岸後見到隻擺渡船被軍人征用來運送武器：疑似一架拆散咗嘅機關砲。以下這組相依次為：上牽引輪、砲座、砲架、擋板、砲筒，最後大叫『開船！』

第一個採石場地盆。採坑排水系統的揚程超過十米。

有冇睇見有童工晌坑底做依份苦工，有啲睇起上來都未夠十歲。我哋香港嘅同齡學童此刻正放緊暑假去歐美遊緊學，如果家庭經濟有困難俾唔出依筆遊學駛費嘅話，可向政府申請津貼，政府會用公拏來為君『扶貧』。如果有學校組織遊學團來此地體驗吓同齡人的生活，唔知香港啲家長肯唔肯俾仔女來呢啊？去歐美或者北京上海嘅所謂遊學，遊多於學，都係玩啫，等佢哋大個咗自已賺到錢先去玩咪仲好！

水中摸石。

摸出的卵石先要經過篩選，篩選不等於沒有普選。否定之否定等於肯定。所以篩選就是普選。

將卵石運出礦坑。

四個人二條木杠只能抬二嚿卵石，可想而知有幾重。不過抬到目的地放低之後，空肩往回走就好輕鬆愉快。

用鋼釺/鐵筆撬石。

從上而下撬落來，石塊跌落水坑中濺到成身泥漿依然好開心，依嘅叫樂觀主義。

再看另一個採石地盆全景。

                                       運砂石的地盤女工。

民工宿舍區。

凡有人(Even Coolie)可以賺到錢嘅地方，一定會有其它人來做生意賺你嘅錢。所以在岸上攤檔林立。凡做此類小生意嘅攤檔，其貨源之80%以上必定係來自世界工廠之我娘親祖國。

當然也賣啲本地手工藝品。尾張係賣沙朗嘅攤檔小東主。

更加會有食得嘅嘢賣，角仔等油器炸到油淋淋，有團友話好吸引，又有團友話好恐怖。

                                       老人、女人、沖涼的男人和頂草的婦孺。

睇完男女老少咕哩晌泥漿中採運砂石，有啲心噏噏唔係好舒服。跟住轉去參觀間小學校，途中要穿過條村，好似又幾富庶，依間紫色屋十分搶眼。

                 路邊盞火水燈却又有些年頭了。手扶拖拉機客貨兩用。

小學校舍和課室中嘅學生妹、學生哥。

                                        小女孩和大男孩。

                                       父與子及村童。

曬魚乾。

                                     檳榔樹一條心。

睇完間學校，行咗好遠先行到依間河邊嘅茶餐廳，坐低抖吓、遮吓太陽飲杯嘢。河對面就係印度地界了

依隻唔知係烏蠅定係黑蜂，對眼好大。

飲完嘢Call咗兩架「的士」返碼頭。有人扛來運砂的竹筐賣。

穿過沙石場時迎面遇上一批剛從對岸擺渡過來衣着光鮮嘅男女，與此時此地的環境十分之唔襯，我等依批香港茂利都相形見絀、自慚形穢，你睇第二張相嘅左下角，着藍色褲白色衫戴頂瓜皮帽嗰位，就係我哋同去伊拉克嘅道友「企先生」，佢槍林彈雨都唔怕，但此一刻佢只管搭低頭向前行，都唔敢望吓側邊從上行落來着黃緞袍嗰個富態女人，真係陰功！實在唔知依班大仙都係乜來頭，唔通係求先條富庶村莊嘅村民？都唔似。

唔理佢哋係乜來頭，我哋都要擺渡返對岸碼頭。

過河時見到有母子仨齊齊企晌河水中沖涼。

『少年不識愁滋味』，睇佢哋泥漿水玩得幾開心！

市集上少女服飾鮮艶。但依個仔仔雖然對眼好大好靚，不過好奇怪此處已近熱帶地方，塊面居然會爆哧，真可惜。

返錫爾赫特市區途中，揾間餐廳食晚餐，環境OK，但又係食嗰隻魚。

車程好長，中途仲要停多次車，俾大家疴野尿。但係見到架車晌度裝煤，唔疴得。

返到錫市仲未天黑，再去參觀一個清真寺。第二張相係女信徒入口，又除鞋又盛，行路人逛咗成日已冇精神再逼入去湊熱鬧，就晌外圍影幾張相算數。

清真寺後有個大水塘，塘中有魚，塘水烏卒卒，却有女人晌度洗面，更有男人洗面又洗脚。

嗰啲男人真係好冇公德性，洗脚本來有專門嘅洗脚池。

男信徒多到要排晌門外崇拜，三跪九叩虔誠到不得了，宗教嘅威力真不得不令行路人佩服並肅然起敬。

崇拜儀式告一段落，樓上嘅信徒落來着番鞋。

清真寺門外依位仁兄，唔知係唔係『拜鎖教』嘅信徒，定係Z醫生所講嘅『間歇性靜態型癔症』患者，胸前背後依條『鎖頭頸鍊』大大話話串咗有不少於二百個大大細細嘅金屬鎖頭。佢問我老公攞咗支煙食，老公大聲同佢講：「你阿媽哎你返屋企食飯嗱！」佢唔識聽廣東話，但分辨到我老公無惡意，所以連連點頭表示明白和同意。

天黑前個Guide再帶我哋去睇錫市依條最古老嘅鐵橋，識得用鋼鐵起橋，古老極都有限啦！冇乜睇頭，何況已經暮色蒼茫、夜幕降臨了。

橋堍的攤檔賣剝咗殼嘅椰子仔，仲有依種唔知係水罐定係痰罐嘅陶器。
依一日，雖然冇乜特別嘅景點睇，內容却又幾豐富，搞到行路人My God，好攰！