我的足跡: 中美洲七國之旅1‧預告篇

《孟加拉國之旅》殺青後，跟坊間C字頭的那家旅行社行了一轉意大利，所謂的『城鄉薈萃深度遊』，共十一天，因坐德航班機，來回都要先飛法蘭克福轉機，且在機上過夜，實得七八天時間觀光，何況是羅馬入、米蘭出，此二個埠以前行過，我倆公婆又無購物之興趣(最後在米蘭機場離境時，全團僅我倆無須排隊辦理退稅手續，Check in後從容出境去Lounge食嘢候機)，不過在羅馬的半天時間，趁團友們在西班牙廣場周圍留連購物，有二個幾鐘的Free time，我倆匆匆趕去『聖天使堡』一遊，入場費每位盛惠11歐羅。

此堡之前未曾踏足過，一般旅行團在羅馬的例牌行程也多不會有此景點，倒也算是填補了一個空白。而最後在米蘭的一整天，全為給人客購物而設(兩個景點史福才古堡和多莫教堂從前都已看過) ，所以這一整天於我倆而言，純係嘥Gas也。扣除首尾二日，唯餘五六日時間可俾你去『城鄉薈萃』，這個「深度遊」深極都有限矣！

意大利回來後又去了一次台灣，來回五天，其目的並非觀光，而是做簽證。緣是下月底參加了一個23天的《中美洲七國之旅》，依次為薩爾瓦多、危地馬拉、伯利兹、洪都拉斯、尼加拉瓜、哥斯達黎加以及巴拿馬。因北美洲墨西哥以南狹長地帶的這七個小國家多與我「今娘親祖國」無邦交，必須去台灣才能做到Visa，而且由旅行社收齊Passport統一派人去代辦都唔得，非要申請者本人親自去辦理，尤其是那個尼加拉瓜最麻鬼煩，其它國家都可將申請Visa的Form提前交俾旅行社代表帶回香港由各申請人填妥後再去台北辦理，而這個尼瓜國的申請表必須本人親自去當場填寫，還聲稱此空白表格不可帶出大使館，都唔知有乜咁巴閉，十分普通平常的申請表，但密密麻麻如綠豆般大小的字母，還要填寫老竇老母嘅全名，都唔知為乜，就算你寫老竇係毛澤東、老母係江青又如何，佢都無從查證。而且堂堂大使館都冇冷氣，又悶又焗，那天老公要踎在地下，在會客室的茶几上填表，我在側邊為之撥扇降溫都仲搞到佢成身汗……。然後再被帶到一個疑似會議室的房間等大使先生逐一召見，此位尼瓜國駐我「前娘親祖國」中華民國的大使乃一後生靚仔，但佢晌Interview時根本就唔問你任何正經問題，淨係逐頁翻閱你的Passport，睇你去過哪些國家，見到我嘅Passport上有舊年的阿富汗簽證，問我「你去過阿富汗斯坦？」我未聽清佢問乜，淨係聽見話乜乜斯坦，但係中亞好多國家都叫乜乜斯坦，又唔記得Passport上的記錄是邊一個斯坦，但也唔理佢講嘅係邊個斯坦，係咁意應酬吓佢話「係啊係阿」，跟住佢就問我「對阿富汗斯坦的感覺如何？」至此我才聽出「斯坦」前的「阿富汗」三個字，但係我又唔知佢嘅政治立場，也不知道他們國家是親美定係仇美的，所以唔敢亂講嘢，就敷衍吓佢：「OK啦」。佢倒也不再追問，總之我盡量用一二個字解決問題，以免講錯嘢。佢在我老公的護照上見到有馬達加斯加的出入境記錄，就問老公對馬達國的印象如何，老公話「好窮」，老公仲想再講落去，俾我使眼色閘住了……。

此「中美洲七國團」共24位道友，其中有一半揸美加澳紐或歐盟國家護照者，此七國全都無須做簽證，而包括行路人兩公乸在內的另一半，無論揸特區護照定係BNO，都要做三國(薩爾瓦多、危地馬拉和尼加拉瓜)簽證，另外四國只要你有美國的有效Visa就可免簽，所以旅行社為我等揸SAR or BNO的12位道友特等先搞了一個「台北五天簽證團」，淨係包來回機票、四晚酒店加機場及去使館之接送，其它一概自理。但其費用幾乎是坊間的機票加酒店Package收費之2至3倍。有位道友乜太，自已不去問旅行社却來電問行路人『點解咁貴？』當正行路人係萬事通。但行路人有問必答：可能係住嗰間酒店(Garden Hotel)貴啲，但依間花園酒店也非台北的一流酒店，未至於貴成咁，依我估計是因為我等12人要夾份凑出領隊二度去台北的機票食宿費用等等，因為領隊在此次帶我行去台北簽證之前，帶齊我等做Visa所需的全部文件，先去一次台北俾大使館過目，睇吓是否滿足使館要求，這些文件包括：Passport copy；美國有效Visa copy；經濟證明如銀行月結單之類；公司放假信；退休人士要有前雇主的證明信(後又通知仲要外加其商業登記copy)；女士若自稱家庭主婦則要有結婚證書等。領隊單獨先行一次回港後，又來電話要再帶備旅遊保險的保單和黄熱針紙，被我老公拒絕，因為老公即時又邏輯思維因子上腦：我此去台北是申請某國之入境簽證，並非入境某國。大使館可能簽俾我，都也有可能睇我樣衰而唔簽俾我。如果三個國家都順利簽俾我，我返港後再打針買保險都未遲，但凡有一個國家唔簽俾我，我就全程都去唔成，咁仲打乜針買乜保險耶，打一針Yellow Fever港府收你五百幾銀，買個普通嘅23天旅保，閒閒哋千幾銀，兩公婆加埋都三四仟文，若果去唔成豈非掟落鹹水海？何況我打唔打針，買唔買旅遊保係我私人的事，是個人的自我保護行為，就如同你搽唔搽蚊怕膏、防晒油一樣，根本與大使館無關。若入境時真的要驗打針紙或燕梳單而我不能提交，你就唔好俾我入境囉，入唔到境我咎由自取，後果自負，都唔關大使館事，佢哋橫惦幾百文簽證費己經袋袋平安，何樂而不為！根據以往經驗，十多年前為去東非、南美等地都打過黄熱針，但無論是東非(如肯雅、坦桑、埃塞或者馬達加斯加)定係南美洲諸國，從未試過有一個國家入境時要查針紙或保單，那張針紙隨Passport帶了十年，從未使用過，如今早已失效。那麼打不打針呢？如你俾簽證我，我當然要打，那是為了我自已入境後不染病而打，並非為了申請Visa而打針，如上所述，萬一你唔簽俾我，我打來做乜？唔通強體補身咩！這就叫程序邏輯……。

老公的這個甚麽勞什子的程序邏輯也不無道理，所謂『不見兔子不撒鷹』，魔童王阿基就是未見到兔子未攞到牌就先把鷹撒出去了，銀紙燒了近十億，反被那個油頭粉面的蘇阿樑局長的風諒說話一言以蔽之：他這是商業行為。意即你自己冇眼光，你未等攞牌先燒錢，未捉到兔子先累死了鷹，係你自作自受，自已抵死。你話有邊個官員應承過俾牌你，但我哋政府冇記錄，你去揾打電話俾你個位「她」攞牌啦！唔服你就去司法復核啦笨！

事實上在台灣做Visa時，這三個國家根本就冇任何國家要求你提交甚麼針紙和保單，也無要求甚麼前僱主的商業登記(若是前僱主間公司已經執咗，去邊處Copy張商業登記返來？) 其實這些根本並非係大使館的要求而不過是旅行社為保護自己的自說自話而已。講起打針，事前也曾有人警告話要一早提前預約，否則趕唔切出發前十天注射而攞唔到針紙云云。行路人多謝其好意提醒但卻並不以為然。因為行路人一早就已吃透了此事的本質。對於要求遊客打防疫針此一層，出發地對此項要求遠甚於入境的目的地國家，換言之香港對此要求的積極性遠高過所謂疫區的非洲和中南美國家，這一層很易理解，於疫區國家而言，如果嚴格要求遊客入境必須持有針紙，則形同趕客，反之如遊客因為冇打針而染了病，對於他們國家並無直接損失，反而患者返到香港後，政府須動用公共醫療資源為其治療，如屬傳染病無論是直接還是簡接傳染，影響就更嚴重。That’s why行路人前一張十年有效的針紙在入境疫區國家時從未被要求出示過。也正因為如此，你打電話去香港的衛生署預約打針時，往往會被告之Booking已經排期到二個月之後，但你完全不必擔心或緊張，此完全是衛生署在虛張聲勢，搞到好似佢哋買賣興隆，生意好到做唔切。佢哋過是以此手法吸引更多的出境遊客去打針。往好處想這是香港政府關心港人的健康，往實惠處想乃是衛署為開拓財路而替庫房創收。大約廿年前打一針黄熱病預防針政府收你港紙260文，行路人96年打第一針時已經加價到370文，17年後的今天，居然不加反減，只收你200文一針，可見十幾廿年前260文也好、370文也好，政府之食水有幾深(來貨價頂籠幾十文耳)。針費減價了，但你且莫高興，除了針費，另外仲要收你一項『診症費用』315文，我冇病冇痛，診乜鬼症啊？原來不知甚麽時候起衛生所在銅鑼灣和西九龍開設了兩處『旅遊健康中心』，出境遊客必須去此二處中心才能打防疫針出到針紙。行路人96年是去廣東道政府合署打此針，無須接受甚麼「診症」，而此次却必須接受『被診症』並為此付費。但為你診症的醫生不過是問你幾個「有無何種药物過敏」之類的問題，再就是告訴你一些外遊的健康常識，全未超出行路人已知的知識範圍。但為取其針紙，不得不被睇症。你只打針唔「睇症」得唔得？唔得！所以此也屬政府的梱綁式銷售(針紙)，你要去非洲、南美洲遊埠，使費閒閒地萬萬聲，睇死你也唔會為區區幾佰文而去消委會投訴，故而樂得斬你一刀。再說回打針排期問題，行路人在台灣見到兔子並捉到手之後，回到香港才致電那個甚麼健康中心約期，預咗佢哋會告訴你要排到一二個月之後，一番討價還價之後，卒之今天下午約期，後天一早就可打針，當然在電話中會告訴你「後天九點半正好有人取消預約」，解決問題就算數，你也不必再篤爆佢作故仔。第三天一早九點三就到了打針中心，清潔阿嬸剛在抹灰拖地，等到醫生坐低與之傾一輪耶蘇後，姑娘打針不用二分鐘就搞掂，打完針仲要你坐十分鐘，觀察有無不良反應。我兩公婆坐到十點多離開，前後近一小時中，再未見一位來求診打針者，真可謂門庭泠落人丁稀，所以你如何去解釋佢哋聲稱排期要排到一二個月之後的笑話。本來全香港每天究竟會有多少人等住去非洲和中南美洲遊埠或公幹乃有數得計，依家搞到五百幾文打一針要好似公公婆婆盂蘭節排隊等派米般，又好似師奶們在上水排隊搶幼稚園報名表般，更好似盲毛們在那家食肆門前排隊等食一碗拉麵咁虛冚，再次借用警隊一哥曾英雄的說話：豈非天方夜譚！依個政府全無公信力，信佢一成兩公婆都會離婚，所以行路人睬佢都傻。

第一天下午搭國泰機飛台北，到涉已是傍晚時分，人哋大使館早已收工，乜事都做唔成。入住酒店後步行去西門町食餐晚飯，返酒店早早揾周公一夜無話。

第二天上午有車送到大使館，與台灣有邦交的國家都屬迷你型，況且統共得番十幾廿零個，幾乎全設在此同一個大樓中，先到二樓的薩爾瓦多使館遞交申請表，由領隊統一付銀紙，無須逐一見大使Interview，但當天出唔到Visa，因為使館要先將申請資料Send去薩國外交部，要等其批覆返來後大使館才出Visa俾你(這就同前二年申請伊拉克和阿富汗的Visa差唔多，首先要申請一個外交部的Visa code)，何時先批返來，話要一二天先得。跟住上三樓到危地馬拉使館，留低Passport，當天下午就可出Visa，倒也不必親自來取，由領隊一併代勞可也。跟住再上九樓洪都拉斯大使館，問吓是否需要做入境簽證，答曰若持有美國有效簽證則不必，但做不做由貴客自定，做的話收費60美金。大家都唔做行路人自也不想多使此60美金。本來尼加拉瓜使館就在二樓，但當日那位靚仔大使要開會，無暇接見我哋，唯有次日再來過。下午無嘢搞，所以就在使館對面的明德站搭捷運去終點站淡水一遊。揾個小館子隨意食啲嘢，就去逛逛紅毛城等景點……。

第三天上午見尼加拉瓜大使，前面已提過不贅。下午搭台鐵去基隆港，冇乜特別嘢可看。

第四天就剩下等薩爾瓦多的簽證，不過可由領隊去使館代取。全日Free time。搭高鐵去新竹，只須半小時，車費155台幣，班次也很密，隨到隨上車。然而抵埗先知上當，原來新竹高鐵站離新竹市好遠，仲要轉搭台鐵普通車，時間比台北過來的高鐵都要長。所以傍晚返台北時就在新竹市內搭台鐵普通車直接回台北，時間與轉高鐵二程車差唔多，車費却慳好多。晚上領隊將Passport(含三隻兔仔) 送到房間，簽證任務宣告完成。

第五天它它調調返香港……。

23天中美洲七國之旅的路線圖如下：

香港-----三藩市-----聖薩爾瓦多市(住三晚)-----安提瓜(危地馬拉)-----奇奇卡斯德南哥-----危地馬拉市-----佛羅雷斯-----提卡爾-----嵩朗敦尼兹神廟(伯利兹)-----提卡爾-----佛羅雷斯-----危地馬拉市-----科潘(洪都拉斯)-----金剛鸚鵡山-----科馬亞瓜-----特古西加帕-----萊昂鎮(尼加拉瓜)-----格拉納達-----馬納瓜-----格拉納達-----拉福圖納(哥斯達黎加)-----雲上森林-----聖荷西-----巴拿馬市(住三晚)-----洛杉磯-----香港